Mwen fanm man sé kann !

Mwen fanm man sé kann !

Mwen fanm man sé kann,
Man dous, man radi osi!
Wou nonm brital, kouté mwen ti bren:
Balan-ou sé van, pawol-ou sé sann.

Mwen fanm man sé kann!
Man pé ba-w dousin’
Mé man pé dékatjé-ou tou
Man pé jis soukoué jipondantel mwen
Ek bwilé lapo-ou épi piman pis kan.
Ou ka chèché mwen ?
Ou ké touvé mwen !

Mwen fanm man sé kann
Ou pé fè siklon si ou lé
Ou pé malmennen mwen si ou lé
Ou pé jété mwen, maché anlè mwen si ou lé

Mwen fanm man sé kann,
Man ké kouché atè, kité ou kwè sé wou ki mèt
Wa chanté kokoriko'ou , rélé kon kok gwo siwo!

Mwen fanm man sé kann,
Apwé lapli sé lanbéli
Lè ou kay sispann fè van,
Man ké doubout ko mwen
Man ké soukoué jipondantel mwen,
Kon poul ka soukoué sann.

Asiré, mwen fanm man sé kann ,
Man ké drésé tèt mwen, fout
Kon matado bwa kanpèch
Pou man gadé-ou an dé koko zyè-ou
Ek man ké ba-ou sa-ou pé tchimbé.

Mwen fanm man sé kann, ou tann ?
Balan-ou sé van, pawol ou sé sann
Pa janmen oblyé sonjé
Ki sé fanm ka fè nonm
Sé pa nonm ki ka fè fanm !