AN TAN MOUN TE NI TAN
An tan moun té ni tan
Mon té ka pran tan visité lafanmi
É sé paté pèd tan di pasé pabo
An vyé matant, an vyé tonton
An gwanmanman on gwanpapa
Oben tchèk vyéko anfonfonnbwa
Fè an déviyé anlè
chimen-w
Paté trop pou té sa fè
Bat mon, désann ravin
Pran kaskou,
Trilbiché nan vyéchimen labou
Pété zotèy
Fè pikan lépini pitjé-ou
Tousa pa té ka fè pèsonn pè
E menm, lè’w téka pasé bo an vyéboutik
Ou té ka trapé ki an zèl lanmori
An po farin,
an tchilopen
Pétètmenm an
boutèy ronm
Filibo osinon
tablèt koko
Détwa zagré
èk ti dousè
Pou dousi tjè tout bonmoun-ou
Yè monchè, An tan moun té ni tan
Bay tan sété bay lanmou
Jodijou, yo di menm an zizinng tan sé lajan
Kifè pèsonn pa lé pèd tan anko
Swadizan pou pa pèd lajan !
E Mi sékonsa tout vyémoun nou
Nan mon, kon nan ravin péyi nou
Ka mantjé anchay lanmou.
Wi, manmay, tan fè tan,
Tan kité tan
mwenmen ka di man
pa ni tan
Men pouotan fok nou pran tan
pran antitaktan
Visité fanmy-nou.
